ചിന്തപ്പെടുന്ന യാഥാര്‍ത്ഥ്യങ്ങള്‍

ചിലത് മനസ്സിലാക്കി വയ്ക്കുന്നത് നല്ലതാണ്.പലരും പലതും പറയും. യാഥാര്‍ത്ഥ്യം അതൊന്നുമല്ല എന്നാണെനിക്കു തോന്നിയിട്ടുള്ളത്. ആത്മാര്‍ഥമായ- സത്യസന്ധമായ സ്നേഹം അല്ലെങ്കില്‍ പ്രേമം ഇതൊക്കെ ഉണ്ട് എന്ന് വെറുതെ പറയുന്നതാണ്. അത് കൊണ്ട് തന്നെയാണ് അതിത്രയധികം ചര്‍ച്ച ചെയ്യപ്പെടുന്നതും. കാമുകന്മാരും കാമുകിമാരും കവികളും എഴുത്തുകാരും സിനിമാക്കാരും പ്രേമത്തെപ്പറ്റി ആവോളം സംസാരിക്കുന്നു. പുകഴ്ത്തുന്നു. പ്രോത്സാഹിപ്പിക്കുന്നു. കാരണം ആ സംഗതി നേരും നെറിയോടെയും വളരെ വിരളമായേ കാണാന്‍ കഴിയൂ എന്നത് സത്യം.അത് പോലെ തന്നെയാണ് മതേതരത്വം. ഇന്ന് അത് ഏറെ ചര്‍ച്ച ചെയ്യപ്പെടുന്നത് തന്നെ അതാരുടെയും മനസ്സുകളില്‍ ഇല്ലാത്തതിനാലാണ്. മതേതരമുഖങ്ങള്‍ പലതും ഇടയ്ക്ക് ഓര്‍ക്കാപ്പുറത്ത് ചിന്തപ്പെടുന്നത് അതുകൊണ്ട് കൂടിയാണ്. 

ആനക്കാര്യം ഒന്നുമല്ല. എന്നാലും ഒന്ന് കരുതിയിരിക്കുക.

ഒറ്റപ്പെട്ടവര്‍

ടാര്‍ റോഡില്‍ ഒരു ചെറിയ കുഴി കണ്ടാല്‍ ഉടനെ പരിതപിക്കുന്നവരാണ് നമ്മള്‍. എന്നാല്‍ ഒരിക്കലും ടാര്‍ റോഡില്‍ ചവിട്ടാതെ ജീവിച്ചു പോകുന്നവര്‍ ഉണ്ടെന്നു പറഞ്ഞാല്‍ വിശ്വസ്സിക്കുമോ...? പലയിടങ്ങളിലും ഉണ്ട് എന്നതാണ് സത്യം. ഇന്നലെ നടന്നു പോയ ഒരു വഴിയാണ്. ഒരു മലമുകളിലേക്ക്. അറുപതോളം കുടുംബങ്ങള്‍ അവിടെ താമസിക്കുന്നു. നിര്‍ധനരായി. നിരാലംബരായി. പ്ലാസ്ടിക് മറച്ച കുടിലുകളില്‍. ഒരു സംവിധാനവും തിരിഞ്ഞു നോക്കാനില്ല. ഒരാള്‍ അത്യാസന്ന നിലയിലായാല്‍ താഴെ എത്തിക്കുക എന്നത് ശ്രമകരം.

പുതുമയുള്ള അഭിസംബോധന

ഇന്‍ബോക്സില്‍ ആള് വന്നു പോകുന്നത് അത്ര പുതുമയുള്ള കാര്യമൊന്നുമല്ല. ചുമ്മാ തുറന്നു കിടക്കുന്നത് കൊണ്ട് ആര്‍ക്കും അനുവാദത്തിന്‍റെ ആവശ്യമില്ലല്ലോ. എന്നാല്‍ അഭിസംബോധന ചെയ്യുന്ന കാര്യത്തില്‍ ചില പുതുമകള്‍ ഒക്കെ ഉണ്ടാകാറുണ്ട്. ഹായ്...ഹലോ...ചേട്ടാ...ചേച്ചീ... സുഖാണോ... എന്നൊക്കെ പലരും വന്നു ചോദിക്കുന്നത് പതിവ് രീതികള്‍. വല്ലോപ്പോഴുമൊക്കെ കാണാറുള്ള ഒരു പ്രത്യേകതരം അഭിസംബോധന ഉണ്ട്.... fb യില്‍ മാത്രം കാണാറുള്ള ഒന്ന്.
" koiiiii " അല്ലെങ്കില്‍
" kooooi " എന്നതാണത്.
ഇങ്ങനെ ഒരു അഭിസംബോധന കണ്ടാല്‍ എന്താണ് മനസ്സിലാക്കേണ്ടത്...? ബംഗ്ലൂരില്‍ പഠിക്കുന്നതോ ജോലി ഉള്ളതോ ആയ ഏതോ ഒരു പെങ്കൊച്ച് ഇന്‍ബോക്സില്‍ കടന്നു വന്നിരിക്കുന്നു എന്ന് തന്നെ.

പച്ച മൂര്‍ഖന്‍...?

ഫണം വിടര്‍ത്തി നില്‍ക്കുന്ന ഈ കുട്ടിക്കുറുമ്പനെ കാണുന്നതാദ്യം. ഏതാണ് ഇനം എന്നറിയില്ല. എന്നാല്‍ അത്ര മോശക്കാരന്‍ അല്ലാന്നു തോന്നുന്നു. ഇവന്റെ പച്ച നിറമാണ് ഏറ്റവും വലിയ പ്രത്യേകത

മിഴിയഴക്‌ മത്സരത്തിനെത്തിയ കോങ്കണ്ണി.

കോങ്കണ്ണിക്ക് 'കമലാക്ഷി' എന്ന് പേരിട്ടതുപോലെ ആയി 'മനുഷ' സംഗമത്തിന്‍റെ കാര്യം.
സത്യസന്ധമായ കാഴ്ചപ്പാടുകള്‍, ഉന്നതമായ ചിന്താഗതികള്‍, ശ്രേഷ്ടമായ പൊതുപ്രവര്‍ത്തന രീതികള്‍, അനുകരണീയമായ മാതൃകാ ജിവിതം, അണുവിട മാറത്ത ദേശീയ ബോധം, ജനാധിപത്യ മൂല്യങ്ങളില്‍ ഉള്ള അടിയുറച്ച വിശ്വാസം, എല്ലാത്തിലുമുപരി ഉള്ളിതട്ടിയുള്ള മാനുഷിക പരിഗണന, സഹജീവികളോടുള്ള കരുണ ഇതൊക്കെയാണ് ഇത്തരം പരിപാടികള്‍ക്ക് പങ്കെടുക്കുന്നവര്‍ക്കു വേണ്ട മിനിമം യോഗ്യതകള്‍.
കാരണം നാളകളിലെ മാറ്റമാണല്ലോ ആത്യന്തിക ലക്ഷ്യം.
അതിനിറങ്ങി പുറപ്പെടുന്നവര്‍ക്ക് തീര്‍ച്ചയായും ചില യോഗ്യതകള്‍ ഉണ്ടായിരിക്കണം.
(ഇതൊന്നുമില്ലാത്തതുകൊണ്ടാണ് ഞാന്‍ വരാതിരുന്നത്)
കൂടുതല്‍ പറയുന്നില്ല....
മനുഷ്യനെ കാണണമെങ്കില്‍ സംഗമത്തിന് പോകണ്ട കാര്യമില്ല എന്ന് പറഞ്ഞു ഒരു പോസ്റ്റ്‌ നേരത്തെ ഇട്ടിരുന്നു. ഇനിയും വെറുപ്പിക്കുന്നില്ല.
എന്തായാലും അനുകൂലിക്കുന്നവരും പ്രതികൂലിക്കുന്നവരും പങ്കെടുത്തവരും കാഴ്ചക്കാരും എല്ലാവരും പ്ലിങ്ങി എന്ന് പറയാതെ വയ്യ.

ഭേദം അന്ധവിശ്വാസികള്‍

കടുത്ത മതവിശ്വാസികളെക്കാള്‍ എന്തുകൊണ്ടും ഭേദം അന്ധവിശ്വാസികളാണ്. അന്ധവിശ്വാസികള്‍ അവരുടെ വിശ്വാസപ്രമാണമനുസരിച്ച് ജീവിക്കുന്നു എന്നിരുന്നാലും മറ്റുള്ളവരെ അവരുടെ വിശ്വാസങ്ങളിലേക്ക് നിര്‍ബന്ധപൂര്‍വ്വം കൊണ്ടുവരാന്‍ പരിശ്രമിക്കാറില്ല. മാത്രമല്ല പതുക്കെ അവരെ അന്ധവിശ്വാസങ്ങളില്‍ നിന്നും മോചിപ്പിക്കാനും കഴിയും. കാലം അത് തെളിയിച്ചിട്ടുമുണ്ട്. പക്ഷെ കടുത്ത മതവിശ്വാസികള്‍...?